Քեզ կյանք կտամ, կյանքիդ մատաղ, սիրո տիպար,
Այս երեկո ինչո՞ւ դու իմ սրտին դիպար,
Չէ՞ որ երգչիս սիրտը սրտիդ նման նուրբ է,
Սեր ես տվել, էլի սիրուդ կարոտում է:
Կյանք տուր, կյանք առ,
Աչքերդ վառ, ունքերդ կամար,
Սեր տուր, սեր առ,
Երգում եմ քեզ, աննման յար:
Թե գալու ես, սրտով արի, սիրով արի,
Փունջ մազերդ փռիր կրծքիս, մխիթարիր,
Ամեն մեկը ոսկե լար է սազ քյամանչի,
Ընտիր վարդ ես հայրենական բաղ ու բաղչի:
Կյանք տուր, կյանք առ,
Աչքերդ վառ, ունքերդ կամար,
Սեր տուր, սեր առ,
Երգում եմ քեզ, աննման յար:
Գուսան Աշոտ, յարի սիրուն սիրտդ սով է,
Գիտեմ, նրա սիրտն էլ սիրո անտակ ծով է,
Զեփյուռի պես երգս եթե նրան հասնի,
Մոտ կգա, մի համբույր կտա, թեև խռով է:
Կյանք տուր, կյանք առ,
Աչքերդ վառ, ունքերդ կամար,
Սեր տուր, սեր առ,
Երգում եմ քեզ, աննման յար: